Nagpasar ang Iloilo City Council sang resolution nga nagahatag sang otoridad kay Mayor Jerry Treñas nga iplastar sang mga abogado sang City Legal Office ang pag-rescind sang kontrata sa tunga sang syudad kag Double Dragon Properties Corporation nga naga- manage sang Iloilo Ferry Terminal.
Sa interview sang Bombo Radyo kay Councilor Rex Sarabia, chairman sang Committee on Appropriations sa konseho, iya ginpahayag nga ini ang ginatan-aw nga nagakaigo nga tikang sang syudad bangud sa pagpakatig-a sang Double Dragon nga liwaton ukon bag-uhon ang kaundan sang agreement nga indi bentaha para sa syudad.
Suno kay Sarabia, pila ka beses na nga ginatinguhaan sang syudad nga makignegosyar sa amo nga kompaniya apang wala man nagapakita ang sin-o man nga tiglawas sang Double Dragon.
Nahibaluan nga isa sa ginaduso sang syudad amo ang equitable revenue-sharing agud mas makabenepisyo ang syudad sa operasyon sang terminal.
Base sa existing contract, may yara lamang sang 1-5% sang gross terminal revenues kag 1 percent halin sa iban nga sources kaangay sang berthing fees, cargo fees, kag mall rentals ang nagakadto sa syudad.
Nasaad man sa agreement nga kinahanglan magpasa ang Double Dragon sang annual operations kag maintenance reports sa city mayor apang ini nga reports ang kulang sa transparency kag public accessibility.
Madumduman nga napirmahan ang agreement sang tion ni anay Mayor Jed Mabilog sang 2012 kag ini ang may 25-year term kag may optional renewal nga 25 ka tuig depende sa desisyon sang Double Dragon.
