Madamo ang mga interesado nga magbaligya sang bulak para sa Pista Minatay sa Iloilo City.
Ini ang rason nga nagpahanumdom na ang Iloilo City Government sa mga vendors nga magproseso sang ila special permit antes mapuno ang mga slots sa designated selling areas.
Sa interview sang Bombo Radyo kay Hana Rubio, head sang Special Services Division (SSD), iya ginpahayag nga 374 ka flower vendors ang nakaproseso na sang ila requirements, lakip na ang mga nakakuha sang stall number.
Apang indi tanan nga aplikante ang ma-accommodate bangud limitado lamang ang espasyo sa mga gin-designar nga baligyaan.
Sa Iznart Street, napuno na ang 110 ka slots sang nagligad nga semana apang bukas pa ang iban nga lugar.
Nalakip diri ang Jaro Plaza nga may 119 ka slots, Seminaryo nga may 60 ka slots kag padayon nga nagabaton sang mga aplikante, Arevalo Plaza nga may 55, Mandurriao Plaza nga may 20 kag Molo Plaza nga may 10.
Samtang, ginapahanugutan lamang ang pagbaligya sang bulak kag ginadumilian ang kandila agud malikawan ang peligro sang sunog.
Sa idalom sang Executive Order No. 103 ni Mayor Raisa Treñas, kinahanglan sang mga vendors ang barangay clearance depende sa lugar nga pagabaligyaan, cedula kag valid ID, pagpirma sang kontrata sa SSD, kag pagtuman sa undertaking form sang ICAST nga nagadumili sa pagpanigarilyo kag paggamit sang vape sa lugar.
Kinahanglan man magbayad sang ₱500 sa City Treasurer’s Office para sa special permit nga valid lamag sa lima ka adlaw— Oktubre 29 tubtob Nobyembre 2.
Pahayag pa ni Rubio, ang kada stall may kalabaon kag kalaparon nga 2 x 3 metros.
Ginpahanumdom man ni Rubio ang mga interesado nga magbaligya nga magproseso temprano sang ila requirements bangud first come, first served ang paghatag sang slots.
