City Government, may ‘Libre Sakay’ subong nga may transport holiday

Naghatag ang Iloilo City Government sang “Libre Sakay” kadungan sang transport holiday sang transport cooperatives sa syudad subong nga adlaw, Marso 23.

Suno kay Mayor Raisa Treñas, gamiton ang government vehicles kag ang service vehicles halin sa tatlo ka major jump-off points agud nga mabuligan ang commuters sa syudad. Ini amo ang Arevalo Plaza, Mandurriao Plaza, kag Jaro Plaza, kag pakadto kag pabalik sa Plaza Libertad.

Ang mga salakyan sang gobyerno magahulat sa designated areas alas-6:00 sang aga, kag magabiyahe ini kun mapuno na padulong sa ila tagsa ka ruta, kag mabalik dayon sa ila starting points agud mas madamo pa gid nga pasahero ang maserbisyuhan.

Suno sa alkalde, padayon ini nga operasyon tubtob alas-10:00 sang aga.

Sa hapon, magaresume ang byahe halin naman sa Plaza Libertad, pakadto sa ila tagsa ka ruta, magasugod alas-4:00 sang hapon tubtob alas-8:00 sang gab-i.

Gina-engganyo man sang alkalde ang mga may pribado nga salakyan nga mag-carpooling agud makahatag sang bulig sa iban nga naga-commute.

Ginapanawagan man sang alkalde sa tanan nga magkooperar kag magplano sang ila byahe samtang ginahimo sang City Government ang tanan nga tikang agud maserbisyuhan ang kadam-an.