Nagahulat na lang ang Iloilo City Government sang sabat sang Commission on Elections (COMELEC) natuhoy sa request sang syudad nga exemption sa spending ban para sa 2025 elections.
Ini agud nga mapaiway sa ban ang social welfare programs kag infrastructure projects sang Iloilo City.
Sa interview sang Bombo Radyo kay Ms. Joy Fantilaga, spokesperson ni Mayor Jery Treñas, iya ginpahayag nga nagalaum ang syudad nga maaprubahan ang ila request.
Suno kay Fantilaga, tinutuyo lamang sang tikang nga tayuyon ang paghatag sang serbisyo sa mga Ilonggo.
Sa bahin naman sang infrastructure, gintu-ad sini nga nag-request na ang COMELEC sang dugang nga requirements kon sa diin, ginatinghuwaan naman nga ma-comply.
Ginhatagan man sini sang punto nga luyag sang city government nga mapadayon ang ‘on-going’ infrastructure project sang syudad.
Nahibaluan nga ang request nagasakop sang 16 ka social welfare program kag 190 ka mga proyekto sa imprastraktura agud masiguro nga indi sila maapektuhan sang spending restrictions sugod Marso 28 tubtob Mayo 11, 2025.
