Nagaplano ang Iloilo City Government sa pagbutang sang mga waste trap sa Jaro River agud nga indi na magbara ang mga basura sa alagyan sang tubig.
Ini ang ginalantaw nga kasunod sang ikaduha nga hugnat sang Oplan Kontra Baha cleanup drive sa porsyon sang amo nga suba.
Sa interview sang Bombo Radyo kay Engineer Neil Ravena, head sang Iloilo City General Services Office (GSO), iya ginpahayag nga nakatutok ang pagpanglimpyo sa second phase sa Barangay Benedicto kag Barangay Tabuc Suba.
Sa masunod nga semana, maga-amat-amat naman saylo ang mga manugpanglimpyo sa Barangay Cubay.
Suno kay Ravena, trabahoso ang ila gina-obra bangud nga nagalubong sa tubig ang basura kag ginapasaka paagi sa crate. Pahayag sini, kinahanglan ang 10 tubtob 15 ka tawo agud madala lamang ang basura pakadto sa truck.
Nahibaluan nga kaupod sang City Government ang Department of Public Works and Highways kag ang Department of Labor and Employment sa pagpanglimpyo.
Ang gin-deploy para sa tatlo ka semana nga clean-up amo ang mga trabahador sa idalom sang Tulong Panghanapbuhay sa Ating Disadvantaged/Displaced Workers program.
Sa una nga hugnat sang cleanup driver sa porsyon sang Jaro River sa La Paz, halos 100 tonelada sang basura ang nakolekta.#
