ILOILO CITY – Labi pa nga ginahugot sang Iloilo City Government ang ginapatigayon nga kampanya batok sa makaalarma nga novel coronavirus.
Sa interview sang Bombo Radyo kay City Councilor Allan Zaldivar, pinuno sang Committee on Health sa Sangguniang Panlungsod, iya ginpahayag nga nagapadayon sa paglibot ang ila nga team agud nga maghatag sang impormasyon sa publiko kaangot sa nasambit nga virus nga nagikan sa Wuhan, China.
Suno sa natungdan, may yara sila sang ginahatag nga information sheet sa publiko sa diin nakabutang diri ang mga sintomas sang coronavirus kag preventive measures agud indi na ini maglapta.
Dugang pa ni Zaldivar, ini man ang ila tikang agud mabuligan ang mga tawo nga madasig nga mabiktima sang sala kag peke nga mga balita sa social media.
Nakaumpisa na ang ila team sa paglibot sa mga merkado, kag sa masunod nga semana, lauman nga kadtuan naman nila ang mga public plaza.
Plano man nga likupon ang tanan nga mga pampubliko nga lugar lakip na ang mga terminal sang salakyan kag mga malls.
