ILOILO CITY- Ginpaidalom sa mass testing ang mga empleyado sang Iloilo City Hall kadungan man sang paglockdown sa bilog nga City Hall building para sa disinfection kasunod sang pagpositibo sa COVID-19 sang 24 ka mga empleyado subong nga bulan sang Mayo.
Sa interview sang Bombo Radyo kay Iloilo City Mayor Jerry Trenas, iya ginpahayag nga required nga magpaidalom sa test ang mga elective officials kag mga workers, lakip na ang job hires kag ang mga yara sa idalom sang contract of service.
Suno sa alkalde, per batch ang testing sa diin ang Iloilo City Health Office ang nagtalana sang schedule sang testing tubtob sa Mayo 28 nga amo man ang adlaw nga magatakop ang lockdown.
Samtang nagahulat sang resulta sang test, magapaidalom anay sang istrikto nga home quarantine ang mga empleyado.
Nahibaluan nga subong man ang ikaduha nga adlaw sang pagpaidalom sa syudad sa MECQ status bangud sa pagtimbuok man sang kaso sang COVID-19 sa Iloilo City.
Ang MECQ magalawig tubtob sa Mayo 31.
