Wala pa sa gihapon nakapagwa sang kompleto nga data kag report ang City Health Office kag City Epidemiology and Surveillance Unit (CESU) may kaangtanan sa isa ka pulis nga nagtaliwan matapos ginapahayag naglain ang pamatyag umpisa sang nakabaton sang first dose sang COVID-19.
Ang nasambit nga police personnel ang assigned sa Arevalo Police Station kag ginapahayag may balatian nga diabetes.
Matandaan nga Hunyo 17 sang nag-avail ang pulis sang first dose sang COVID-19 vaccine kag pagkasunod nga adlaw, naglain ang pamatyag sini rason nga nag-file ini sang sick leave.
Hunyo 25 sang napatay ang pulis bangud sa cardiac arrest sa diin sang Hunyo 26, naggwa ang resulta sang COVID-19 test kag ginpahayag nga nagpositibo ini sa COVID-19.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginapahayag nga may yara na sang natipon nga mga impormasyon ang City Health Office kag CESU may kaangtanan sa inisyal nga medical record sang police personnel apang subject pa ini sa gihapon for validation.
Suno kay Conlu, ginahulat man nila ang pamilya sang pulis nga maghatag sang dugang nga mga impormasyon may kaangtanan sa nangin health status sang ila himata.
Gin-athag man ni Conlu nga sa subong, nagakadapat nga indi pag i-relate ang COVID-19 vaccine sa kamatayon sang police personnel bangud nagakinahanglan pa sang ma-id-id nga imbestigasyon ang matuod nga gintunaan sang pagkamatay sini.
