ILOILO CITY – Nagpanugyan ang Iloilo City Health Office sa publiko nga magpakonsulta sa doktor sa tion nga makabatyag sang sintomas sang infectious conjunctivitis ukon mas kilala nga sore eyes.
Pila sa mga sintomas amo ang pagbasa sang mata, pagpula, pagkatol kag pagbatyag sang sakit sa mata.
Sa syudad sang Iloilo, nagdangat na sa 168 ka mga kaso sang sore eyes ang na-record sa bulan sang Hunyo.
Kun pahat-pahaton, 40 ang na-record sa Jaro; 26 sa Arevalo; 22 sa Molo; 19 sa Tanza, City Proper kag Mandurriao; 18 sa La Paz kag Sto. Rosario; kag anum sa La Puz.
Kalabanan sa mga nalatnan sang sore eyes ang naga-edad 1-10 kag 45-51.
Sa interview sang Bombo Radyo kay Dr. Kenneth Capero, Medical Officer sa Iloilo City Health Office, iya ginpahayag nga mas maayo nga magpakonsulta sa doctor agud nga ma-assess sang maayo kag mahatag ang insakto kag nagaka-angay nga bulong.
Dugang pa niya, may ginbakal ang syudad nga bulong para sa nasambit nga balatian kag libre ini nga ma-avail sa mga health centers.
Pahayag dugang sang natungdan, madasig nga maglapta ang bacteria gani kinahanglan nga mag-obserbar sang proper hygiene kag proper handwashing.
