ILOILO CITY – Wala sang coordination ukon wala nakapakig-angot sa City Health Office ang grupo nanday Iloilo City Councilor Alan Zaldivar may kaangtanan sa
pagpatigayon sang fogging sa Brgy. San Pedro, Molo, Iloilo City.
Ini ang kasunod sang kamatayon sang duha ka biktima bangud sa ginapahayag paghaklo sang aso nga naghalin sa fogging agud kun tani nga matapna ang Dengue Hemorrhagic Fever.
Sa interview sang Bombo Radyo kay Dr. Bernard Caspe, pinuno sang City Health Office, iya ginpahayag nga wala siya sang may nabaton nga sulat halin kay Zaldivar.
Suno kay Caspe, bag-o kun tani magpatigayon sang fogging sa isa ka barangay ukon eskwelahan, may yara sang letter of request nga ginapakita sa barangay officials ukon sa school principal.
Ginpahayag ni Caspe nga bag-o magpatigayon sang fogging, ginapahibalo ang tanan nga pumuluyo agud nga makalikaw sa paghaklo sang aso nga mahimo makatuga sang nanasari-sari nga balati-an.
Sa pagpaathag ni Caspe, ang chemical nga ginagamit sa fogging ang may yara sang simpon nga krudo nga amo ang nagatuga sang aso.
Sa subong suno sa natungdan, wala na nagapatigayon ang City Health Office sang fogging kag sa baylo, misting na lang ang ginapatigayon sa diin ang ginagamit amo ang water-based chemicals.
