ILOILO CITY – Ginatahod sang City Legal Office ang nangin desisyon ni Rosita Camacho nga magpalapit kay Atty. Salvador Panelo agud nga magpangayo sang bulig may kaangtanan sa iya reklamo batok kay Iloilo City Mayor Jerry Treñas.
Sa interview sang Bombo Radyo kay Atty. GV Cuñada sang City Legal Office, iya ginpahayag nga kinamatarong ni Camacho nga magpangayo sang bulig direkta sa Digong 8888 Hotline sa diin nagaserbe nga host si Panelo.
Suno kay Cuñada, wala man siya sang may mahimo kun wala sang pagsalig si Camacho sa City Legal Office nga amo ang naga-uyat sang reklamo batok sa mga empleyado sang Iloilo City Hall.
Ginpahayag ni Cuñada nga may yara sang isa ka komitiba nga nakatuon sa pag-usisa kun bala may yara sang probable cause sa reklamo batok sa isa ka empleyado antes ang paghatag sang rekomendasyon nga ipadayon ang kaso.
Sa ila bahin sa City Legal Office, ginpahayag sang natungdan nga ila lang nga ginahimu kun ano ang ila katungdanan kag wala na sila nagapahilabot sa political affiliation sang empleyado.
Lakip sa mga pagsulundan nga ila ginasunod amo nga ginahatagan nila sang plaso ang ginareklamo agud nga makapaathag apang sa tion nga mapaslawan, padayunon sang City Legal Office ang pag-usisa santo sa ebidensya nga ila gina-uyatan.
Nahibalu-an nga indi lamang si Camacho ang may yara sang pending case sa City Legal Office may kaangtanan sa kontrobersiya sa Iloilo City Hall.
