ILOILO CITY – Wala sang nangin problema kag handa ang pila ka mga local strandees nga mag bayad sa chartered flight agud lang makapauli sa Iloilo halin sa Manila bangud masobra duha ka bulan na ang mga ini nga na stranded.
Sa interview sang Bombo Radyo kay Iloilo City Tourism Office Head Junel Ann Divinagracia , iya ginpahayag nga nakig-angot sa iya ang isa ka local strandee kag negosyante nga si Jonathan Granada agud makapauli sa syudad.
Nakakita sang kahigayunan si Divinagracia nga buligan si Granada proseso sang mga papeles agud nga makapauli pinaagi sa chartered flight.
Suno kay Divinagracia, siya mismo ang naghingyo kay Granada nga pa-updon sakay sa eroplano ang 32 pa nga mga local strandees.
P502,000 ang arkila sa eroplano kag ginkasugtan sang tanan nga mga pasahero nga ma-amot sang tag-P5,000, apang sang ulihi, nadesisyunan ni Granada nga P4,000 na lang ang isukot sa kada isa.
Gani tuman na lang ang pagpasalamat ni Divinagracia kay Granada sa pagbulig kag pagsuporta sa iban nga local strandees agud lang nga makapauli.
Pahayag niya, wala siya sang ihibalo kun ngaa may naga guwa nga impormasyon nga nagapanukot siya sa mga local strandees bangud indi man ini matuod.
Dugang pa sang natungdan, ang chartered flight ang indi libre kag indi gasto sang gobyerno kundi sang isa ka private individual nga may maayo nga tagipusuon.
