ILOILO CITY – Kinahanglan nga magbinuligay ang mga opisyal sang kabarangayan kag ang City Veterinary Office agud matatapan ang mga layaw nga ido sa syudad.
Ini ang sabat ni City Veterinarian Dr. Tomas Forteza sa suhestiyon ni Liga ng mga Barangay President Irene Ong nga ila lamang pamunuan ang magpanguna sa pagpanakop sang mga layaw nga ido.
Sa interview sang Bombo Radyo kay Forteza, iya ginpahayag nga indi kinahanglan nga magkabalaka ang mga punong barangay bangud indi pagpabay-an sang ila pamunuan ang ila responsibilidad.
Kaangot diri, ginpahayag ni Forteza nga may yara programa nga ginapatigayon ang City Veterinary Office nga paghatag sang libre nga training sa mga barangay tanod kag volunteer sa mga kabarangayan nahanungod sa insakto nga pagpanakop sang mga ido nga layaw kag amo man sa animal welfare.
Una na nga napatigayon ang ini nga programa suno kay Forteza sa Brgy. San Rafael sa distrito sang Mandurriao.
Ginpahayag man ni Forteza nga dapat mag-umpisa man ini sa iban nga kabarangayan.
Dugang ni Forteza, nagapati siya nga kun napaintindi sang mayo ang mga pumuluyo, wala na sang mga ido nga layaw nga dalakpon.
Dugang pa sang natungdan, ginapatigayun ang isa ka operasyon sa mga narescue nga ido: kun sa ido nga babayi, ini ang ginatawag nga spaying sa diin ginakakas ang ovary. Sa ido naman nga lalaki, ginatawag ini nga castration ukon pagkapon.
Ang lamang ginalantaw nga problema suno kay Forteza amo ang kakulang sang pasilidad kun diin posible mapahamtang ang nasambit layaw nga mga ido.
