ILOILO — Dugangan sang Civil Aviation Authority of the Philippines sang 300 seats ang Iloilo Airport agud nga maakomodar ang mga pasahero ilabi na sa pre-departure area.
Sa interview sang Bombo Radyo kay Engr. Eusebio Monserate Jr., Civil Aviation Area Manager sang CAAP Region 6, nagadamo na ang pasahero sang nasambit nga paluparan kag ginakulang na ang pulungkuan.
Pahayag niya, may yara sang 720 seating capacity ang Iloilo Airport sa pre-departure area kag kulang ini.
Rason nga may yara sang proyekto ang CAAP subong nga tuig sa diin dugangan sang 300 seats ang paluparan.
Dugang pa sang natungdan, bangud nagadamo ang pasahero sa sulod, dugangan man ang airconditioning system.
Sa subong nga tinion suno kay Engr. Monserate, ang mga technical engineers sang talatapan ang yara sa Japan para sa pag-inspect sang chiller kag sa tion nga ini ang matapos, i-deliver ini sa Rehiyon.
Ang dugang nga tatlo ka mga chiller ang ibutang sa masunod nga bulan sa din magahatag ini sang kasulhayan sa airport terminal building.
Nahibaluan nga ang Iloilo Airport ang naga-isahanon lamang nga paluparan sa Western Visayas nga ginhatagan sang certification para sa Environmentaly Airport bangud nakapasar ini sa international standard.
