ILOILO – Tuman ka importante sa kabuhi sang isa ka tawo ang mga dukomento kasubong sang Birth, Marriage kag Death Certificate.
Ini ang pahanumdom sang Philippine Statistics Auhtority ilabi na nga ginasaulog subong nga bulan sang Pebrero ang Civil Registration Month.
Sa Good Morning Philippines program, ginpahayag ni William Jaro, Division Chief sang Civil Registration and Administrative Support Division sang Philippine Statistics Authority 6, nga ang mga nasambit nga dukomento ang makabulig sa pagtumod sang identity kag sa pagkuha sang benepisyo kag prebelihiyo.
Suno kay Jaro, ang data nga makuha sa birth, marriage kag death ang ginagamit sa data collection, survey kag iban pa nga katuyu-an sang gobyerno.
Ginpahayag ni Jaro nga ang pagsaulog sang Civil Registration Month sa kada bulan sang Pebrero ang nag-umpisa sang ginpirmahan ni anay Presidente Corazon Aquino ang Proclamation number 682.
Samtang, kalabanan naman sa mga reklamo nga nabaton sang Philippine Statistics Auhtority amo ang clerical error ukon sala nga spelling, blank name kag lain ang pangalan nga nakarehistro sa pangalan nga ginagamit sang tagreklamo.
Suno kay Mary Grace Dorilag, Officer- in -Charge sang Civil Registration and Administrative Support Division sang Philippine Statistics Authority 6, indi dapat magkahadlok nga mag-apply para sa correction.
Ginpahayag ni Dorilag nga kun kaisa, indi man malikawan nga sala ang data nga maparehistro ilabi na sa live birth kag mas makapaayo nga mag-apply gilayon para sa correction agud nga matadlong ang sala nga records.
Ang tagsa ka application for correction suno kay Dorilag ang may yara man sang filling fee nga pagabayaran apang indi kasubong sa nagalapta nga impormasyon nga tuman ini ka mahal.
Mas ginpahapos na sa subong suno sa natungdan ang pagkuha sang corrected documents bangud nga sa centralisation process sang gobyerno.
