Naglab-ot na sa 32 ka mga clamping operation ang naimplementar sang Iloilo City Traffic Management Unit (ICTMU) sa syudad sugod sang nagligad nga semana.
Sa interview sang Bombo Radyo kay Ret. Police Colonel Uldarico Garbanzos, head sang Iloilo City Traffic Management Unit, iya ginpahayag nga sa kabug-usan nga 32 nga na-clamp, 29 diri ang na-settle na ang ila accounts kag natigayon nga ma-release.
Suno kay Garbanzos, kalabanan sa mga na-clamp nga mga salakyan ang four-wheels vehicle kon ikumpara sa 2-wheels vehicle.
Ginpahayag man sini nga may yara man sang mga tricycle nga na-clamp apang gamay lang.
Gin-ako man sang natungdan nga dako nga problema sa Iloilo City ang on road parking kag amat-amat na ini nga ginapasangkad paagi sa pagbantay sa mga mayor nga dalan.
Nagalaum man ang talatapan nga mabuhinan ang obstruction sa dalan kag malikawan ang pagpugok sang trapiko matapos nga maimplementar ang amo nga tikang.
