Ginkalipay sang mga opisyal sang Barangay Calaparan, Arevalo, Iloilo City ang kooperasyon kag koordinasyon sang mga pumuluyo sa ginpatigayon nga clean-up drive agud matapna ang Dengue Hemorrhagic Fever.
Matandaan nga base sa Enero, 2021 tubtub Hulyo 31, 2021 nga report sang Iloilo City Health Office, nakarekord ang nasambit nga lugar sang 11 tanan ka kaso sang Dengue Hemorrhagic Fever nga nagahalin sa mga lamok.
Sa interview sang Bombo Radyo kay Barangay Kagawad Rodrigo Montaño sang Brgy. Calaparan, Arevalo, Iloilo City, iya ginpahayag nga sa subong, cleared na ang ila lugar batok sa nasambit nga balatian sa diin ginaduso nila ang adlaw-adlaw nga pagpatigayon sang clean-up drive.
Suno kay Montaño, ang tanan nga basura nga mahimo tiniran sang tubig ang gilayon nila nga ginatipon kag ginahaboy.
May gindesignar man nga barangay officials sa kada zona agud nga mangin mas organisado ang pagpaninlo sa palibot.
