ILOILO CITY – Nagsapol ang pamunuan sang Public Safety and Transportation Management Office agud istoryahan ang pagpatigayon clearing operations sa national roads sa Syudad sang Iloilo.
Ini ang kasunod sang mandu ni Presidente Rodrigo Duterte sa nga hawanan ang tanan nga nagasablag sa national roads.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office , iya ginpahagayag nga nagtambong sa pagsinapol ang mga tiglawas sang Land Transportation Office, Iloilo City Government, Highway Patrol Group, Department of Public Works and Highways kag Philippine National Police kun sa diin gin-istoryahan ang mga lihok nga pagahimuon.
Suno kay Conlu, unahon nila sa paghawan ang mga mayor nga dalanon nga gina-agyan sang mga pampubliko nga salakyan.
Samtang, kakason gid ang mga balaligyaan nga nagalaksam sa higad sang dalan.
Hatagan sang notice ang business owners samtang indi naman paghatagan sang abiso ang mga madugay na nga ginapahalin.
Sa labing madali nga tion, maga-umpisa na ang Public Safety and Transportation Management Office sa pagpatigayon sang clearing operations.
