ILOILO CITY – Naglab-ot sa kapin 300 tanan ka mga close contact sang COVID-19 positive sa syudad sang Iloilo ang ipaidalom sa Reverse Transcription Polymerase Chain Reaction (RT-PCR) test subong nga adlaw.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government iya ginpahayag nga ang nasambit nga mga close contact ang nagikan sa isa ka establisemento komersyal sa Izeem Commercial sa Zone 3, Barangay Magdalo, La Paz, Iloilo City kag mga existing local transmission.
Lakip man diri suno kay Conlu ang close contact sang Hinduja Global Solutions sa SM Strata sa Mandurriao, Iloilo City sa diin una nga nagtimbuok ang kaso sang COVID-19 sa masobra 100.
Suno kay Conlu, wala sila nagauntat sa pagpahanumdom sa publiko nga mangin vigilante sa pagsunod sang tanan nga minimum health protocol agud matapna ang lapnagon nga COVID-19 cases sa syudad sang Iloilo.
