ILOILO CITY-Natapos na ang contact tracing sang Guimaras Provincial Government sa mga naka-close contact sang duha ka Locally Stranded Individuals nga nauna nga nagpositibo sa Coronavirus disease 2019 apang nagnegatibo sa repeat testing.
Sa interview sang Bombo Radyo kay Guimaras Governor Samuel Gumarin, iya ginpahayag nga ginpaidalom na sa quarantine ang mga nalakip sa contact tracing apang wala sang eksakto nga numero sang mga gin-contact trace nga ginhatag ang gobernador.
Matandaan nga ang mga LSIs nga nauna nga nagpositibo sa COVID-19 amo sanday Patient No. 475, nga taga Nueva Valencia, Guimaras kag Patient No. 476, nga taga- San Lorenzo, Guimaras.
Samtang, nagpatigayon sang coastal clean up ang Guimaras Provincial Government agud kuhaon ang mga nabilin nga bunker fuel kasunod sang oil spill nga nagluntad nga resulta sang paglupok sang power barge sang AC Energy sa Bo. Obrero, Lapuz, Iloilo City sang damlag lang.
Sa interview sang Bombo Radyo kay Guimaras Governor Samuel Gumarin, iya ginpahayag nga ginpatigayon ang clean-up sa Barangay Hoskyn, Jordan, Guimaras kag gin-updan sang mga Local Government Units sa probinsiya kag mga ahensya sang gobyerno.
Ginreklamo naman sang gobernador ang kakulang sang mga personal protective equipment nga ginhatag sang Ayala Corporation para magamit sa pagpatigayon sang clean up.
May kaangtanan naman sa nagahilapit nga anibersaryo sang trahedya sa Iloilo -Guimaras Strait sa diin tatlo ka pumpboats ang nagkulob nga ginkamatay sang 31 ka mga tawo sang Agusto 3,2019, ginpahayag sang gobernador nga may patigayunon nga simple nga seremonya sa Buenavista Wharf kag Jordan Wharf agud dumdumon ang nasambit nga trahedya.
