ILOILO CITY- Ginpamatbatan na sang alkalde sang Syudad sang Iloilo ang siyam ka mga establishments nga naglapas sa Executive Order 46 ukon General Bar Guidelines.
Sa interview sang Bombo Radyo Iloilo kay Mr. Norman Tabud, pinuno sang Business Permit and Licensing Office, iya ginpahayag nga ginpirmahan ni Iloilo City Mayor Jerry Treñas ang rekomendasyon sang composite team nga dagdagan sang 5 ka adlaw nga closure ang nasambit nga mga establishments.
Ini ang ginalakipan sang Angel A Bar, Juan’s Martha Food Corp., Project X, Sinukad Seafood Restaurant, Bull and Barel, HQ Beercade, Floyd’s Famous BBQ, Paraiso Night Club kag Camp Jefferson Disco Pub.
Pila sa mga violations nga nakumiter sang siyam ka mga establishments amo ang naglapas sang anti-smoking, wala sang na-install nga Closed Circuit Television camera, wala sang nakadesignar nga guwardiya ukon bouncer, kag pagserbe sang makahulubog nga ilimnon sa mga menor de edad.
Subong nga adlaw iga-serbe sa nasambit nga mga establishments ang nasambit nga closure order.
