Ginpaandaman sang Commission on Audit (COA) ang Social Security System (SSS) bangud sa paggamit sini sang pondo sang tuig 2024 sa pagbakal sang tissue paper rolls nga nagabalor sang 13.195 million pesos.
Suno pa sa ahensya nga ang pagbakal sang linibo ka mga tissue paper rolls wala naplanuhan sang maayo kag makabulig pa kuntani ang kwarta nga gingastos sa masobra 2000 ka mga SSS pensioners.
Dugang pa sang COA nga makabulig pa ini kuntani sa pambayad sa funeral benefits sa mga myembro nga nagakinahanglan.
Ginpahayag man sang ahensya nga halos P3 milyon ang underpayment sa funeral benefits sang SSS kag may ara man nga nagkalamatay na apang nabaton pa sini ang ila pension benefits.
Gindugang pa sang COA nga naghatag ang SSS sang cash incentives nga nagalab-ot sa P50, 000 sa kada isa sa 6,525 ka mga opisyal sini kun sa diin naglab-ot sa P333 milyon pesos ang prestige award nga nahatag sa mga myembro sini.
(SSS 222)
Naghingyo naman ang COA sa SSS nga magsumite sang ila evaluation report natuhoy diri kay kun mapamatud-an nga may sala ang ahensya kinahangalan sini nga ibalik ang unsubstantiated cash incentives nga ila ginpangahatag.
