Nakabaton ang syudad sang Iloilo sang positibo nga review sa ginpatigayon nga 2021 Commission on Audit (COA) Exit Conference.
Sa interview sang Bombo Radyo kay Iloilo City Mayor Jerry Treñas, iya ginpahayag nga wala sang adverse findings sa tanan nga transaksyon sang Iloilo City Government sang nagligad nga tuig.
Buot silingon sini, wala sang transaksyon nga gin-flag ang COA nga misrepresented ukon misstated bangud tanan ini ang nalista ukon ‘all accounted for’.
Suno pa sa alkalde, wala man sang adverse findings ang COA pati sa Covid-19 vaccine procurement sang syudad apisar may pila ka tawo nga nag-kwestyon sini nga deal sang syudad.
Gindepensahan man sang alkalde ang anay kontrobersyal nga isyu sa pagbakal sang 13 ka Mitsubishi Strada pickup vehicles para sa kada opisina sang tagsa ka konsehal sa syudad.
Suno sa alkalde, tanan ini ang nag-agi sa procedure kag may permit halin sa Department of the Interior and Local Government (DILG).
Nangin mainit man sa mata sang publiko sang una ang drone system deal sa syudad bangud naglab-ot ang presyo sang drone sa P800,000 bangud rason sang syudad, may yara ini sang iban nga component kaangay sang Real Time Kinematic (RTK) Receiver, rover, DJI Phantom IV Drone, kag threes sets sang training para sa personnel.
Suno sa alkalde, yara ang drone sa Iloilo City Engineer’s Office, wala ginausar, kag wala man ginpabayaran sa syudad.
Gin-athag sang alkalde nga ‘ALL ACCOUNTED FOR’ ang tanan nga gasto; pati ang donasyon sang pribado nga sektor.
Mensahe sang alkalde, “The Exit Conference with COA together with the pertinent department heads clearly showed that good governance is practiced in Iloilo City. We passed it with flying colors. There are areas that need improvement, but I am proud that the whole team has done so much. Our success is basically because of our team efforts.” ##
