ILOILO CITY – Liwat nabutang sa hot seat ang delegasyon sang Negros Occidental sa nagapadayon nga Western Visayas Regional Athletic Association (WVRAA) Meet 2018 nga ginapatigayon diri sa siyudad sang Iloilo.
Ini matapos nga ginbuyayaw kag ginsapote sang coach sang football secondary men sang Negros Occidental, ang referee sa amo nga hinampang.
Sa interview sang Bombo Radyo Iloilo, ginpahayag sang technical official nga si Dax Ian Barreto nga nagsugod ang komosyon sa ika-20 nga minuto sang hampang matapos wala nagustuhan sang coach nga si Ian Combate ang call sang referee nga si Steve Suprepencia.
Apang sang nagpaathag ang referee, nagsingki-anay sila sang coach nga rason agud sapotehan ini ni Combate kag nagpuli man ang mga players.
Gilayon naman ginpauntat ang hampang kag desisyunan kun ipadayon pa ini ukon i-disqualify ang Negros Occidental.
Sang nakaligad lang nga adlaw, napreso man ang miyembro sang delegasyon sang Negros Occidental nga si Jose Montalvo matapos ginhaboy sang plastic bottle ang professor sang Central Philippine University sa volleyball game sa tunga sang Iloilo kag Negros Occidental.