Kumpyansa si Coach Steve Kerr nga mangin maayo na ang kondisyon sang NBA superstar kag three-time Olympic gold medalist nga si Kevin Durant kun magsugod na ang hampang sang USA men’s basketball team sa Paris Olympics.
Byernes sang nag-abot ang Team USA sa Abu Dhabi para sa duha ka naka-schedule na nga exhibition games batok sa Australia (July 15) kag Serbia (July 17) bilang preparasyon sa Olympiada.
Yara man si Durant sa session sa NYU Abu Dhabi campus subong nga weekend apang wala ini gihapon nag-upod sa iya teammates sa practice. Ginalantaw nga bangud ini gihapon sa calf strain nga iya naangkon duha ka semana na ang nagligad.
Sa pihak sini, wala nagakahangawa si Kerr kag ginkumpirma man sini nga wala pa sang naistoryahan nga contingency plans agud nga islan ang Phoenix Suns forward sa roster.
‘Individual work’ lang anay ang himuon ni KD suno sa coach kag nagapati sila nga mangin “okay” ini pag-abot sa Paris Games.
Nahibaluan nga magluwas kay Durant, yara sa American ‘super-team’ sa Olympic Games ang NBA leading scorer nga si LeBron James, Stephen Curry, Anthony Davis, Anthony Edwards, kag ang recently crowned NBA champions nga sanday Jayson Tatum kag Jrue Holiday sang Boston Celtics.
Sang nagligad nga adlaw, opisyal nga nag-atras sa team si Kawhi Leonard kag ginbuslan sang ikatatlo nga Celtic nga si Derrick White.
Lima tanan ka friendly games ang yara sa schedule sang USA antes ang Paris Games. Sa una nga tune-up match, ginlutos sini ang Canada 86-72 sa T-Mobile Arena sa Las Vegas.
