Isa sa ginabantayan nga hampang sa World Cup 2022 sa Qatar amo ang pag-atubangay sang Estados Unidos kag Iran, duha ka pungsod nga may masobra 40 ka tuig nga may malas-ay nga relasyon.
Pareho nga yara sa Group B ang duha ka nasambit nga pungsod.
Sa pagkit-anay sang duha ka team sa soccer field, ginpromisa sang ila tagsa ka coaches nga ipahigad anay ang away — kaangay sang diplomatic kag military confrontation — kag magtutok anay sa tournament.
Nahibaluan nga gina-akusaran sang Estados Unidos ang Iran nga amo ang nagasuporta sang mga pagpang-atake sa Middle East, lakip na sa U.S. forces sa Iraq kag Syria.
Sang 2020, diutayan lang nga magsulod sa gyera ang duha ka pungsod matapos nga ginpatay sang US ang pinakamataas nga Iranian general kag nagbalos naman ang Tehran sang missile strikes sa U.S. forces sa Iraq.
Sa ila nga pag-atubangay sa Qatar na Nobyembre, 2022, kaupod nila sa Group B ang England kag ang winners sa European playoff — ang Ukraine, Scotland ukon Wales.
