ILOILO CITY – Ginkalipay sang mga residente sa mga barangay sa coastal road sa Lapuz, Iloilo City ang paghawan sang dalan.
Ini ang kasunod man sang natabo sa pagbunggo sang isa ka motorsiklo sa trailer truck nga illegal nga naga-park sa kilid sang dalan sa Brgy. Loboc, Lapuz, Iloilo City nga ginkamatay sang driver.
Ang biktima amo si Jessmark Gabral, 23, kag residente sang Barangay Mansaya, Lapuz, Iloilo City.
Sa interview sang Bombo Radyo kay Dandy Yee, residente sang Barangay Mansaya, Lapuz, Iloilo City, iya ginpahayag nga humalin sang natabo ang aksidente, nangin hugot na ang pagbantay sang mga katapo sang Iloilo City Police Office kag Traffic Enforcement Unit (TEU) sa lugar.
Suno kay Yee, adlaw-adlaw nga nagapatigayon sang inspekyon ang mga otoridad sa ila lugar agud matapna ang mga nagapatigayon sang illegal parking.
Nagalaom man ini nga magpadayon na ini agud malikawan ang aksidente kag indi na maggutok ang mga salakyan sa ila lugar.
