“Coastal uplift” sa Sarangani Province, normal occurrence—Dr. Jerry Bionat, former PDRRMO head

Ginplastar sang isa ka disaster risk management professional nga normal occurrence lang ang “coastal uplift” sa tion sang pagluntad sang linog.

Halimbawa diri ang natabo sa Sarangani Province matapos ang natabo nga magnitude 7.8 nga linog sang Hunyo 8.

Suno sa Phivolcs, ang coastline nag-alsa sang kapin duha ka metros samtang ang shoreline naman ang nag-isol sang ginabanta 200 metros nga nagresulta sa pagka-expose sang mga corals kag pagkalamatay sang mga isda.

Sa interview sang Bombo Radyo kay Dr. Jerry Bionat, former head sang Iloilo Provincial Disaster Risk Reduction and Management Office (PDRRMO), iya ginpaathag nga kun may linog, wala lang nagauyog ang kalibutan, sa baylo, ini ang nagahulag man.

Suno kay Bionat, ini nga paghulag ang posible pasaka, panaog, ukon pakilid, depende sa sahi sang fault kag mga pwersa nga involved.

Pahayag ni Bionat nga antes ang linog, ang mga tectonic plates ang masami nagatapikanay samtang ginatulod ang isa kag isa.

Ini nagatuga sang pagporma sang stress kag kun ini ang indi masarangan sang mga plates, nagabuka ini ukon nagadanlog nga nagaresulta sa linog.

Kun may hinali nga paghulag, ang iban nga sections sang crust ang mahimo matulod pasaka nga ginatawag uplift samtang ang iban nga sections mahimo manaog nga ginatawag nga subsidence.

Pahayag niya, ang natabo sa Sarangani ang indi man makatilingala apang nangin visible lang bangud yara ini sa coastline nga makita sang mga tawo.

Ginsiling naman niya nga may tsansa nga magbalik ini nga pagtupong sang coastline apang magalawig ini sang dinekada paagi sa mga pwersa kaangay man sang linog.