Ginasunod sang local government unit sang Maasin ang tanan nga pagsulundan may kaangtanan sa pagpatigayon sang bulang sa ila nga banwa.
Sa interview sang Bombo Radyo kay Mayor Francis ‘Ansing’ Amboy, iya ginpahayag nga may yara siya sang gintukod nga team nga amo ang nagahimo sang on-the-spot inspections sa arena kun may yara sang cockfight operations.
Suno sa alkalde, sang liwat nga ginpahanugutan ang bulang paagi sa executive order nga ginpagwa ni Iloilo Governor Arthur Defensor Jr., siya mismo ang personal nga nagpadulong sa cockpits agud matan-aw ang lugar nga ginapatigayunan sang bulang.
Nagpasalig si Amboy nga sa ila banwa, wala sang personal nga presensya sang mga audience sa bulangan, wala sang online kag remote betting ukon pagpustaanay, kag wala sang live broadcasting ukon telecasting sang cockfights.
Kun malapas ini nga mga pagsulundan, ginapaandaman ang mga cockfight operators nga bawion ang ila permit.
