Iloilo City – Nagpanindugan ang Iloilo Sports Men Incorporated nga wala ini sang gin-bayolar nga layi angot sa kontrobersyal nga Candelaria Derby sang Enero 30 tubtob 31, 2023.
Ini apisar nga wala nag-issue sang resolution of no objection ang Iloilo City Council para sa nasambit nga cockpit operator.
Sa interview sang Bombo Radyo kay Iloilo City Councilor Atty. Rommel Duron, iya ginpahayag nga tion na agud hatagan sang igtalupangod ang pagrepaso sang ordinansa kun sa diin wala pa sang cockfighting ordinance sa sulod sang 49 ka tuig.
Suno kay Duron, nagakinahanglan sang kaathagan ang mga requirements sa pagkuha sang special permit sa Iloilo City Government antes nga patigayunon ang cockfighting event.
Ginpahayag dugang sang natungdan nga magdepende kay Iloilo City Mayor Jerry Treñas ang desisyon natuhoy sa insidente.
Nagpangabay naman si Duron sa mga cockpit operators nga mahimo mag-secure sang permit isa ka bulan antes patigayunon ang cock derby agud mahatagan sang tyempo ang mga official nga repasuhon ini.
