Nagapamayagpag sa lokal nga industriya sang kape sa Iloilo ang mga coffee growers sa banwa sang Igbaras.
Ang grupo nga Sitio Buyuan Baras Coffee Growers Association (SBBCGA) sa Brgy. Tigbanaba, Igbaras, nagatuyo nga indi lang mangin isa ka negosyo sa ila komunidad ang pagpananum sang kape, kundi buhion man ang coffee industry sa probinsya sang Iloilo.
Sa interview sang Bombo Radyo kay Ernesto Elgario Emano Jr., Quality Control Manager sang SBBCGA, iya ginpahayag nga apisar madamo sila sang naagyan nga mga pagpanghangkat, padayon gihapon ang mga ini sa ila kawsa, asta nga nangin supplier na ang mga ini sang coffee beans sa nagkalain-lain nga coffee shops sa syudad sang Iloilo.
Tuyo man sang grupo nga solusyunan ang problema sang ‘aging farmers’ ukon naga-edad nga mga mangunguma, nga isa sa mga rason sang pagnubo sang produksyon sa nagkalain-lain nga sector sang agrikultura.
Nagpanawagan man ang mga ini sa mga pamatan-on sa karun, nga magbalik kag mag-invest sa sektor sang agrikultura, agud mapabakod ang industriya kag masiguro ang padayon nga pag-uswag sang lokal nga agrikultura.
Matandaan man nga sang damlag lang, nagdisisyon ang Department of Agriculture (DA) nga magabukas ang mga ini sang bag-o nga talatapan nga magapokus sa pagpauswag sang industriya sang kape sa Pilipinas nga mangin dako nga bulig sa kaangay nga grupo sang mga mamumugon nga tuyo magpaumwad sang amo nga produkto.
