ILOILO– Nagpalab-ot sang simpatiya si Iloilo 3rd District Cong. Lorenz “Nonoy” Defensor sa mga himata sang apat ka manunudlo sang Lambunao National High School nga nagpatay sa trahedya sa Iloilo Strait.
Sa interview sang Bombo Radyo kay Defensor, iya ginpahayag nga nagalaum siya nga kun tani magserbe nga pahanumdom sa tanan nga pumuluyo ang natabo nga trahedya kun sa diin nagkulob ang tatlo ka pumpboat.
Suno kay Defensor, nagakapadat nga mangin pahanumdom sa gobyerno ang natabo nga insidente agud paayuhon pa gid ang mga pasilidad nga ginagamit sa tion sang emerhensya.
Ginpahayag ni Defensor nga luyag niya nga mas pasangkaron pa sang Philippine Coast Guard ang ila nga operasyon agud mangin mas madasig ang paghatag sang bulig sa tion sang rescue operation.
Nagalaom man ang natungdan nga mas pagatutukan sang national government ang Philippine Coast Guard nga nagabantay sa kadagatan.
Usisaon man ni Cong. Defensor kun ano pa gid nga lihok ang mahimo buhaton para sa kaayuhan sang nasambit nga ahensya.
