Naubos gid ang P200,000 nga koleksyon sang collector sang isa ka motor parts supplier matapos gin-hold up sang iya kaupod nga driver sa Barangay Lanit, Jaro, Iloilo City.
Ang biktima naga-edad sang 25-anyos, residente sang Negros Occidental, samtang ang suspek naga-edad sang 40-anyos kag residente sang Barangay Balantang, Jaro.
Pareho sila nga naga-trabaho sa motor parts supplier sa Iloilo City Proper.
Sa interview sang Bombo Radyo kay Police Mavin Laraño, hepe sang Iloilo City Police Station 3, iya ginpahayag nga halin sa Quinto Distrito ang duha, apang pag-abot sa Lanit, Jaro, nagdeklarar sang hold-up ang suspek.
Ginpahayag nga nangtaya ini sang kutsilyo, kag gin-istorya pa ang biktima nga mapasensyahanay lang sila bangud kinahanglan sini ang kuwarta.
Suno sa pulis, nagrason pa ang suspek nga may mga kabataan ini kag balatian gani nga nagakinahanglan gid sang kwarta.
Pagkatapos nakuha ang P200,000, ginpahayag nga nagpalagyo ini sa direksyon nga pa-Leganes. Nagsakay ini sa motorsiklo nga naka-park na nga daan sa area.
Sandig sa motor parts supplier nga gina-obrahan sang duha, halos isa pa lang ka bulan nga naga-trabaho sa ila ang suspek.
Sa assessment sang pulis, gin-plano na sang suspek ang pagpang-hold-up ilabi na nga may ideya ini kun pila ang balor sang kuwarta nga ila makolekta subong nga adlaw.
Padayon pa subong ang pagpangita sa suspek paagi sa pag-trace sa CCTV footages.#
