[Content warning: suicide / self-harm. Reader discretion advised.]
Nasapwan nga wala na sang kabuhi kag nagapaligo sang iya kaugalingon nga dugo ang isa ka college student matapos nga gin-utas ang iya kaugalingon sa sulod sang simbahan sa Barangay Poblacion, Passi City.
Ang biktima ang ginkilala kay alyas Kenneth, 21, isa ka college student nga nagakuha sang kurso nga Bachelor of Science in Business Administration, kag residente sang Calinog, Iloilo.
Sa interview sang Bombo Radyo kay alyas Nato, nakasaksi sang insidente, iya ginpahayag nga samtang nagalakat ini, natulangdan niya ang isa ka solterito nga nagpanaog sa tricycle kag nagsulod sa simbahan.
Suno pa sa iya, pagligad lang sang pila ka minutos nga nakasulod ang amo nga lalaki sa simbahan, nakabati ini sang matunog nga lupok nga ginkatingala sini.
Gilayon man nga ginlantaw ni Alyas Nato ang sulod sang simbahan kag didto nga nakita niya nga nagahuray-ad na ang biktima kag wala na sang kabuhi samtang ginauyatan pa ang armas nga gingamit sini sa pag-utas sang iya kaugalingon.
Natigayon man nga nakuhaan sang pahayag si PLT. Sharina Cepeda, Deputy Chief of Police sang Passi City sa diin gintuad sini nga base sa imbestigasyon, ini na ang ikaduha nga attempt sang biktima nga magpanginmatay.
Suno kay Cepeda, may ginbilin nga suicide note para sa iya pamilya kag nakita man sa iya bag ang duha ka cellphone kag papel nga may nakasulat nga password sang iya telepono.
Nahibaluan nga ang ginikanan sang biktima ang yara sa Manila, kag nagaishanon lang ini nga naga-estar sa ila puluy-an sa Calinog, Iloilo.
Wala man sang foul play nga nakita kag posible problema sa pamilya ang ginatudlo nga rason sang pag-utas sini sang iya kabuhi.
Gintinguhaan pa nga dal-on kuntani ang biktima sa ospital, apang gindeklarar nga dead on arrival bangud sa naangkon sini nga patal nga pilas sa ulo nga rason sang iya kamatayon.
=========================
[SUICIDE PREVENTION HOTLINE CENTER FOR HEALTH DEVELOPMENT – WESTERN VISAYAS]
1-800-10-333-8336
09985324047
09255469919
WVSUMC – 3202431 loc. 162 or 209
3292360
WVMC – 3211797 loc. 186
5037708
PMHU – 5298109
