Makabig nga ikaduha sa nagapanguna nga cancer death sa mga kababainhan ang colorectal cancer kag ikatatlo naman sa mga kalalakihan.
Sa interview sang Bombo Radyo kay Dr. Elvin Tiangha, iya ginpahayag nga ang colorectal cancer amo ang kilala nga bowel cancer, colon cancer ukon rectal cancer nga nagaapekto sa colon kag rectum.
Suno kay Tiangha, bangud sa pag-abanse sang screening techniques kag pagsangkad sang treatments kag bulong, nabuhinan na ang death rate sa colorectal cancer.
Pila sa mga sintomas sang nasambit nga balatian suno sa doktor amo ang masunod:
- fatigue ukon pagkakapoy;
- pagkakulang sang iron sa lawas;
- diarrhea, pagpalanakit sang pus-on, pag-angkon sang bukol sa tyan;
- maitom ukon may dugo nga lakip ang higko;
- gulpyada nga pagniwang; kag
- masami nga pagbatyag sang kabusog kag pagpalanakit sang tyan
Lakip sa nasambit nga sintomas suno kay Tiangha ang mahimo magresulta sa iban nga health condition apang importante nga magpacheck-up sa doktor kun maglawig ini nga mga sintomas sang masobra apat ka semana.
Ginpahayag sang doktor nga lakip sa mga treatment sang colorectal cancer amo ang chemotherapy.
Mahimo man suno kay Tiangha magpaidalum sa Radiation therapy ang isa ka pasyente nga may amo nga cancer agud mapunggan ang pagdamo sang cancer cells.
Nagpahanumdom man ang natungdan sa publiko nga likawan ang masami nga pag-inom sang makahulubog nga ilimnon kag pagpanigarilyo nga mahimo magresulta sa amo nga cancer.
Mas maayo suno kay Tiangha nga magkaon sang utan kag mag-ehersisyo agud makalikaw indi lamang sa cancer kundi sa madamo pa nga sahi sang balatian.
