Tatlo lang ka political aspirants ang naka-file sang Certificate of Candidacy (COC) sa Iloilo City – Commission on Elections (Comelec) kahapon, Oktubre 1.
Duha diri ang tuyo magpadalagan sa pagka-konsehal: una, si Mel Carreon, popular political contender, nga 11 na ka tuig nga naga-file sang COC, kag ikaduha, si Rovelson Bagares, isa ka retired police official nga residente sang Barangay Calumpang, Molo, Iloilo City.
Nangisog naman si Vicente Ang, residente sang Rizal Pala-Pala II, Iloilo City Proper nga magpasakop sa mayoral race kag bungguan ang kandidatura ni incumbent Mayor Jerry Treñas.
Sa interview sang Bombo Radyo kay City Election Officer Atty. Renier Layson, iya ginpahayag nga indi pa ini sila makabig nga opisyal nga kandidato para sa May 2022 national and local elections bangud wala pa naga-umpisa ang campaign period.
Tubtub sa Oktubre 8 ang filing sang COCs.
Bukas ang Comelec Office halin 8:00 am tubtub 5:00 pm kag bisan sa Sabado kag Domingo.
