Wala sang major reshuffling ang mga election officers sa Western Visayas samtang nagahilapit ang 2025 May Midterm Elections.
Sa interview sang Bombo Radyo kay Atty. Dennis Ausan, Regional Elections Director sang Commission on Elections 6, iya ginpahayag nga may yara lang sang mga personnel nga na-promote sa mas mataas nga posisyon ukon may bag-o nga appointments rason nga may paghulag sa pila ka mga probinsya.
Si Atty. Ausan ang magapabilin bilang Director sang Comelec Region 6.
Suno kay Ausan, sa lima ka mga probinsya sa Western Visayas, tatlo ka mga Provincial Election Supervisors (PES)ang ginsaylo.
Si Atty. Wil Arceño ang yara na subong sa Antique matapos makapangalagad bilang PES sa Capiz.
Si Atty. Hazel Palencia ang yara na subong sa Guimaras matapos makapangalagad bilang PES sa Antique.
Si Atty. TicTac Villanueva ang yara na subong sa Capiz matapos makapangalagad bilang PES sa Guimaras.
Samtang, sanday Atty. Reinier Layson ang nagapabilin nga PES sang Iloilo kag si Atty. Roberto Salazar ang PES sa gihapon sang Aklan.
Paathag ni Atty. Ausan, ang pag-reshuffle sang mga election officers ang indi bangud nga may pamilya ang mga ini nga kandidato sa lugar kun sa diin sila na-assign sadto.
Dugang sang natungdan, ang pagsaylo sang mga opisyal ang kabahin sa personnel movement policy sang Comelec sa diin ginasiguro nga yara ang mga ini sa position nga epektibo sila nga makaserbe samtang ginalikawan ang malawig nga assignment sa isa lang ka lugar.
