ILOILO CITY- Magapatigayon sang command conference ang pila ka mga ahensya sang gobyerno may kaangtanan sa pagsugod sang campaign period sa Marso 25 para sa local elections.
Sa interview sang Bombo Radyo kay Atty. Wilfred Jay Balisado, director sang Commission on Elections(COMELEC) Region 6, iya ginpahayag nga magluwas sa COMELEC, magatambong man ang katapo sang Armed Forces of the Philippines (AFP) kag Philippine National Police (PNP) kag iban pa nga deputized agencies.
Suno kay Balisado, ini ang patigayunon sa Cam. Martin Delgado.
Ginpahayag sang natungdan nga istoryahan nila ang may kaangtanan sa mga aktibidad sang mga kandidato partikular na sa mga areas sa bilog nga Region 6 nga yara sa watchlist areas kag ang assessment sa sini nga mga lugar agud mahatagan sang nagakaigo nga intervention.
Dugang niya nga sa subong, 44 ka mga areas sa bilog nga rehiyon ang nalakip sa election watchlist areas(EWAS) kag mahimo nga mabag-o pa ini depende sa pinakaulihi nga assessment.
