Gin-athag sang Commission on Elections (Comelec) nga pwede gid makapangampanya ang mga barangay officials para sa partido ukon kandidato nga ila ginasuportahan sa May 2022 elections.
Sa interview sang Bombo Radyo kay Iloilo City Election Officer Atty. Tomas Valera, iya ginpahayag nga wala sang prohibition sa mga opisyal sang barangay sa pagpangampanya bangud indi sila covered sang ban sa electioneering kag partisan activities.
Paathag ni Valera, elected officials ang mga barangay officials gani nga indi sila sakop sang constitutional ban nga mag-intra sa partisan political activities ukon mangampanya para sa kandidato nga ila naluyagan.
“Kun elected officials sila, indi sila dala sa civil service. Ang indi ya pwede makapangampanya amo na ang naga-obra sa gobyerno nga ara sa civil service ukon ang unIformed personnel,” suno kay Valera.
Ang pagdumili lang sa barangay officials nga magdala sang ngalan sang partido ukon ang ginatawag nga “non-partisanship” ang gina-apply lang sa barangay-level elections, indi sa local and national elections.
LIMITASYON SANG BARANGAY OFFICIALS
Apisar nga ginapahanugutan ang mga barangay officials nga magpangampanya sa certain political group ukon kandidato, may yara man sang mga limitasyon nga gin-set agud wala sang dayaay nga matabo sa adlaw sang eleksyon.
Suno kay Valera, sa adlaw sang eleksyon, indi allowed ang mga barangay officials nga magtinir sa sulod sang polling precincts, magluwas lang kun magboto.
Kun magpangampanya naman, indi pwede paggamiton sang barangay officials ang barangay hall, barangay vehicle, ukon anuman nga ginapanag-iyahan sang gobyerno. Nakasaad ini sa idalom sang Section 261(O) sang Omnibus Election Code nga tanan nga ginapanag-iyahan sang gobyerno, indi pwede nga gamiton para sa election campaign ukon anuman nga sahi sang partisan political activity.
Dapat nga personal nga equipment ang ila nga gamiton suno kay Valera.
KATUNGDANAN
Ang mga barangay officials ang deputized man agud nga magbulig sa Comelec sa pag-monitor kag pag-report may kaangtanan sa conduct sang election activities sa nasakpan sang barangay.
Dapat nga i-report sang barangay kun makit-an nga nagalapas ang kandidato ukon ang political party sa mga minimum health standards and protocols, amo man sa guidelines sang poll body. ##
