ILOILO CITY- Ginrekomendar ni Commission on Elections (COMELEC) Commissioner Rey Bulay ang termination sang deal sa debate organizer nga Impact Hub ukon Vote Pilipinas.
Sa naggwa nga memorandum, gin-flag ni Bulay ang pila ka mga iregularidad sa partnership.
Ginmandu man niya ang madalom nga imbestigasyon batuk sa mga imbolbado sa amo nga deal.
Ginahatagan man niya sang ultimatum ang pila ka mga high-ranking officials sang tubtob sa Lunes gid lamang agud nga maghatag sang “honest and clear explanation” natuhoy sa subong kontrobersyal nga deal.
Sa memo, ginkwestiyon ni Bulay kun ngaa nga napilian ang Impact Hub kag kun paano ginhibalo ang ila nga background.
Dugang pa ni Bulay, ang pila ka mga kaupdanan niya ang handa nga mag-hatag sang tubtob sa P15 million halin sa budget sang COMELEC agud lamang nga masalbar ang Impact Hub nagikan sa utang sa hotel apang wala sang may nakahibalo kun ano ang mangin basehan sa pag-release sang pondo.
Nadiskubrehan man ni Bulay nga sanday director James Jimenez kag Frances Arabe ang nagduso kay COMELEC chairman Saidamen Pangarungan kag commissioner Socorro Inting nga mag-release sang P15 million pesos nga ginpirmahan man sang mga natungdan.
Ginapangita ni Bulay ang kontrata para sa ‘counterpart money’ kag sang P15 million nga cover up money kag ginkwestiyon man sini kun ngaa nga wala napresentar sa en banc kag indi ang Bids and Awards Committee ang nag-handle sa amo nga bagay.
Nadiskubrehan man ni Bulay nga ginpasalig ni Jimenez ang hotel nga masarangan sang Impact Hub ang amo nga utang pinaagi sa isa ka sulat nga napetsahan sang Abril 1.
Ginkwestiyon ni Bulay kun bala otorisado si Jimenez nga maghatag sang garantiya kag kun bala, nahibaluan ni Jimenez ang financial status sang Impact Hub.
Sa amo nga sulat, ginpahayag ni Jimenez ang isa ka “notice of award” nga gin-grant sa Impact Hub nga nagabalor sang P15.3 million.
Ang ini nga dokumento ang mabaskog nga pamatuod nga ang COMELEC ang magabayad sa amo nga utang suno kay Bulay.
Ang Impact Hub nga ginapamunuan sang CEO nga si Celeste Rondario ang nag-isyu sang bouncing checks sa Sofitel Philippine Plaza nga amo ang nagtulod sa hotel nga magpangayo sang bulig sa COMELEC sa pagsukot sang masobra sa P14 million nga balayran.
Ini man ang rason nga na-delay ang presidential kag vice presidential townhall debates.
Samtang, sa ginpaggwa nga statement ni Director James Jimenez, nabaton niya ang inter-office memorandum nagikan kay Bulay kag ginmanduan siya kag ang iban nga opisyales nga magsumite sang paathag.
Suno kay Jimenez, nakahanda sila nga magsunod sa deadline.
Dugang pa ni Jimenez, base sa mandu ni Bulay, ang tanan nga sabat niya ang dapat nga una nga mahibaluan sang commissioner kag bangud sina, indi na siya makahatag pa sang dugang nga detalye.
Samtang, suno naman kay director Frances Arabe, tun-an anay niya ang alegasyon batuk sa iya kag sundon ang mandu ni Bulay nga magpasa sang paathag sa natalana nga deadline.
