Ginakonsidara sang Commission on Elections (COMELEC) ang pag-review sang pagsulundan sa in-person campaigning para sa 2022 election kasunod sang pila ka mga reklamo naghalin sa mga kandidato.
Suno kay Comelec Chairman Socorro Inting, ang pagsulundan sa May 2022 election ang ginhimo sang ginpaidalom sa Alert Level 3 status ang pila ka lugar sa pungsod.
Suno kay Inting, bangud sa posibidad nga may mga lugar nga ipaidalom sa Alert Level 1 status, bukas ang COMELEC nga i-modify ang campaign rules.
Samtang, gin-athag naman ni Comelec spokesperson James Jimenez nga ang pagligwat sang Comelec rules ang magabase sa guidelines sa Inter Agency Task Force (IATF) for Emerging Infectious Disease.
Suno kay Jimenez, ini ang nakasaad sa idalom sang Section 29 sang Comelec Resolution 10732.
Nahibaluan nga sa idalom sang Section 14 sang amu nga resolusyon, ang mga masunod nga aktibidad ang ginadumili-an sa in-person campaign sa tanan nga Alert Level Category:
- handshakes, paghaksanay, paghalukay, kag iban pa nga naga-involve sang physical contact sa tunga sang mga kandidato, ila kaupdanan kag ang publiko.
- pagkuha sang selfies, photographs kag iban pa nga naga-require sang close proximity sa tunga sang kandidato ila kaupdanan kag ang publiko.
- pagpanagtag sang pagkaon kag ilimnon
- pagpatigayun sang house-to-house campaigning kag;
- pagtuga sang pagtinumpok sang tawo nga nagalapas sang minimumpublic health standards.
Ang maglapas sa amu nga mga pagsulundan ang mahimo mapreso sang indi magnubo sa isa ka tuig kag indi maglapaw sa anom ka tuig.
Ang magalapas naman sang minimum public health standards ang mahimo multahan sang indi magnubo sa P20,000 kag indi maglapaw sa P50,000 ukon pagkapreso sang indi magnubo sa isa ka bulan kag indi maglapaw sang anom ka bulan.
