Madayon gid ang kandidatura sang religious leader nga si Apollo Quiboloy sa 2025 senatorial elections matapos nga ginbasura sang Commission on Elections (Comelec) en banc ang motion for reconsideration nga gin-file agud balabagan kuntani ang election bid sang pastor.
Sa resolution nga ginpaguwa kahapon, Disyembre 27, wala ginpalusot sang en banc ang mosyon nga ginpasaka sang senatorial aspirant nga si Sonny Matula nga nagatuyo kuntani nga baliskadon ang nauna nga desisyon sang Comelec First Division nga nagatugot kay Quiboloy sa pagpadalagan.
Ginsiling sang en banc nga wala sang valid ground nga gin-raise sa motion kag na-address na sang first division ang mga isyu nga gin-call out sang nagpetisyon.
“We find no cogent reason to depart from the Assailed Resolution of the Commission (First Division). The arguments raised by Petitioner in his Motion were already thoroughly passed upon and incisively examined by the Commission (First Division),” suno sa en banc resolution.
“At the outset, the combination of different remedies and prayers in a petition to declare as nuisance candidate or disqualification or cancellation of a certificate ground is a ground for summary dismissal, and this is clearly and explicitly mandated by Our rules. Even if this procedural defect is brushed upon, We find the ruling of the Commission (First Division) to have sufficiently addressed and discussed the substantive issues thoroughly and exhaustively,” dugang pa sa amo nga desisyon.
Ang latest resolution ang pirmado nanday Comelec chairman George Garcia, Commissioners Socorro Inting, Marlon Casquejo, Aimee Ferolino, Rey Bulay, Ernesto Ferdinand Maceda Jr., kag Nelson Celis.
Una na nga nagpahayag si Quiboloy nga magapapili na lamang siya sa Mayo 2025 bilang isa ka independent candidate.
Ang pastor amo ang founder sang Kingdom of Jesus Christ kag long-time ally sang mga Duterte.
Diri sa Pilipinas, may kaso siya nga child abuse kag human trafficking sa mga korte sa Quezon City kag Pasig City. Yara subong sa kustodiya sang Philippine National Police.
Sa Estados Unidos naman, salalampaw man ang iya nga mga kaso-kriminal nga nagalakip sang Conspiracy to Engage in Sex Trafficking by Force, Fraud and Coercion, and Sex Trafficking of Children; Sex Trafficking by Force, Fraud, and Coercion; Conspiracy; kag Bulk Cash Smuggling.
