Gin-ako sang Iloilo City Commission on Elections (COMELEC) nga isa ka ‘honest mistake’ sang Iloilo City Police Office (ICPO) ang natabo nga indi paglawag kay mayoral candidate nga si Roland Magahin sa ginhiwat nga Caravan, Unity Walk and Covenant Signing para sa 2025 National & Local Elections nga ginpatigayon sa Iloilo Freedom Grandstand.
Sa interview sang Bombo Radyo kay Mr. Jonathan Sayno, Election Assistant II sang Iloilo City COMELEC, iya ginpahayag nga tanan nga mga kandidato ang ginpadal-an sang sulat sang imbitasyon agud magtambong sa amo nga kahiwatan.
Suno kay Sayno, ang staff sang kampo ni Magahin ang nagpadulong sa ila agud magpahibalo nga wala nalawagan ang amo nga mayoral candidate.
Ginpahayag man sini nga gintinghuwaan gid sang talatapan nga malawagan si Magahin agud ma-recognize.
Gin-athag man sang natungdan nga ginhatagan gid sang kahigayonan agud mahatagan sang exposure si Magahin kasunod sang na-miss-look ang pangalan sini.
Nagapangayo man sang pasaylo ang Iloilo City Police Office (ICPO) kay Magahin bangud katapo man sang pulis ang nag-host sang kahiwatan.
Nahibaluan nga si Magahin nga residente sang Bo. Obrero, Lapuz, Iloilo City, ang independent candidate kag anay presidente sang Iloilo Terminal Market Vendors Associations (ITMVA).
Ang natungdan ang isa man ka negosyante kag nagaserbe nga kag foster father ni former World Boxing Foundation (WBF) welterweight king William Magahin.
