Gin-athag sang Commission on Elections (COMELEC) nga indi na kinahanglan sang presensya sang ila katapo sa pagpatuman sang check point para sa ginapatuman nga gun ban kaangot sa 2025 midterm elections.
Sa interview sang Bombo Radyo kay Atty. Reinier Layson, supervisor sang Commission on Elections – Iloilo Province, iya ginpahayag nga masarangan na sang katapo sang Philippine National Police (PNP) kag sang Armed Forces of the Philippines (AFP) ang pagpatuman sang check point sa probinsya.
Suno kay Layson, pahanugotan lamang nga magdala sang armas ang isa ka indibidwal kon nakagawad sang certificate of authority halin sa ila opisina.
Sa subong, may yara sang masobra isa ka libo ka mga indibidwal sa bug-os nga Pilipinas ang exempted sa gun ban bangud sa may certificate of authority.
Nagpasalig man ang natungdan nga naka-heightened alert ang otoridad kag pila ka security agency sang gobyerno subong nga may gun ban.
Nagpanugyan man si Layson sa publiko ilabi na sa mga may armas nga likawan anay nga dal-on ini sa pampubliko nga lugar.
