Wala ginbaton sang Commissions on Elections (COMELEC) ang permit applications sang presidential candidates nga sanday Vice President Leni Robredo, Manila Mayor Isko Moreno kag labor leader Leody de Guzman para sa ila ginpatigayon nga election activities kahapon, Pebrero 8 sa pila ka bahin sang Pilipinas.
Suno kay COMELEC director Lai David, denied ang application ni Robredo para sa iya campaign event sa National Capital Region (NCR) bangud sa kulang nga dokumento.
Denied man ang application ni Moreno para sa ginpatigayon sini nga motorcade sa Central Luzon bangud sa kapaslawan nga maka-secure sang permit sa sulod sang 72-hour deadline.
Pahayag ni David, pat-od nga magapangatubang man si Ka Leody de Guzman kag ang kampo sini sang nagakaigo nga penalidad bangud sa pagbayolar sang election offense.
Ini bangud natukiban sang COMELEC nga wala gid ini nakapasa sang application permit para sa ginpatigayon nga campaign rally sa Bantayog ng Mga Bayani sa Quezon City.
Una na gin-athag ni COMELEC spokesman James Jimenez nga ang kapaslawan sang kandidato sa pag-file sang application permit, indi nagakahulugan nga banned na ini sa pagpatigayon sang nanuhay-tuhay nga sahi sang kampanya.
Nahibaluan nga sa idalom sang pagsulundan sang COMELEC para sa physical campaigning, ginamanduan ang mga kandidato nga mag-secure sang permit naggikan sa Comelec Campaign Committee para sa ila patigayunon nga campaign activities.
Ini nga permit ang naga-regulate sang mass gatherings ilabi na sa mga lugar nga may pagtimbuok sang kaso sang COVID-19.
Sa pag-umpisa sang 90-day campaign period para sa nationally-elected positions, una na nga nagpahanumdom si Department of the Interior and Local Government (DILG) spokesman Jonathan Malaya sa mga kandidato kag supporters nga sundon gid ang tanan nga mga regulasyon kag health protocols, agud malikawan ang penalidad kag pagka-preso.
Sa mga magalapas sa health protocols, ginpahayag ni Malaya nga magapangatubang ang violators sang pagka-preso tubtob anum ka bulan nga may multa nga P20,000 tubtob P60,000, depende sa discretion sang Korte, kag nakadepende man sa charges nga ipasaka sang COMELEC ukon Philippine National Police (PNP).
