Gin-athag sang Commission on Elections (Comelec) nga fake news ang nagalapta nga impormasyon nga indi makaboto sa May 2025 elections ang mga botante nga wala sang National ID.
Nagalagaw subong online ang “No National ID, No Vote” public advisory, apang base sa klaripikasyon halin sa poll body, wala sila sang na-release nga amo nga abiso sa bisan diin man nga social media platform.
“The supposed ‘No National ID, No Vote’ public advisory is FALSE and DID NOT ORIGINATE from the Commission on Elections,” suno sa Comelec.
Pahayag pa sang poll body, sa adlaw sang eleksyon, pangitaan lamang sang valid ID ang botante pananglitan indi ma-verify ang ila nga identity sa Election Day Computerized Voters’ List (ECVL).
Nagpahanumdom man ang talatapan sa publiko nga beripikahon gid ang mga impormasyon paagi sa official sources.
Matandaan nga sang damlag lang, naglunsar ang Comelec sang precinct finder para sa May 2025 elections kun sa diin pangitaan ang botante sang full name, birthday, kag place of registration.
Sa pihak nga bahin, nakapahayag anay si Comelec Chairman George Erwin Garcia nga ang voter information sheet (VIS) nga ginpanghatag sa kada registered Filipino voter ang mahimo magserbe bilang “kodigo” ukon cheat sheet sa election day. Apat ka pahina ini nga information sheet nga naga-unod sang precinct number, voting reminders kag instructions, kag pangalan sang national and local candidates.
