ILOILO CITY — Ginklaro sang Commission on Elections (COMELEC) nga wala sila sang may nakita nga prohibitions sa gin-ubra nga manifesto of support sang Barangay Yulo Drive, Villa Arevalo, Iloilo City para kay Iloilo City Mayor Jerry Treñas.
Sa interview sang Bombo Radyo kay Atty. Dennis Ausan, Regional Director sang Commission on Elections Region 6, iya ginpahayag nga base sa omnibus election code kag election laws, wala sang may nagapakita nga may prohibitions ukon nagadumili sa amo nga manifesto.
Suno kay Ausan, indi man election year kag wala sang filing of candidacy ilabi na nga indi man election campaign period sa diin dira maga-epekto ang mga layi nga nakasaad sa election code.
Ginpahayag man sini nga ginarespeto sang ahensya ang tikang nga ginpaguwa sang nasambit nga barangay agud suportahan si Treñas.
Gin-athag man sang natungdan nga apisar sang mga opinyon sang iba sa manifesto, wala sang isa man ang makataas sa layi.
Matandaan nga sang damlag lang, nagpakita sang suporta ang tanan nga mga opsiyal sang nasambit nga barangay sa kandidatura ni Iloilo City Mayor Jerry Treñas, Raisa Treñas-Chu, kag Iloilo City Vice Mayor Jeffrey Ganzon.
