ILOILO CITY- Liwat nga ginpaathag sang Iloilo City Comelec ang proseso sa pagpili sa kun sin-o ang magabulos sa nakabante nga posisyon sang nagtaliwan nga si Kagawad Armand Parcon.
Sa interview sang Bombo Radyo kay Mr. Jonathan Sayno, Assistant City Election Officer II, sang City Comelec Office, iya ginpahayag nga ang magabulos kay Parcon ang igarekomenda sang prominent majority party nga ginhalinan sang nagtaliwan nga konsehal.
Suno kay Sayno sang tion sang proklamasyon buhi pa si Parcon kag naka-upod ini sa proklamasyon sa mga konsehal nga nakakuha sang pinakamataas nga boto.
Nagakahulugan ini suno sa iya nga may yara na sang mandato nga magapungko si Parcon apang napatay ini rason nga indi ang rule of succession ang pagasundon sa pagpili sang magabulos agud makumpleto ang 12 ka mga kosnehal sa syudad sang Iloilo.
Kung nagtaliwan naman si Parcon suno kay Sayno sang tion nga wala pa natapos ang election canvassing, indi pagkilalahon ukon isispon ang boto nga nakuha sini kag ang ika 13 nga konsehal amo ang igadeklarar nga nagdaog.
Sa bahin naman sang unfinished term ni Parcon, nakita na sang ila partido nga alang-alang na ang tion sa pag-appoint sang magaserbe tubtob sa Hunyo 30 rason nga wala nalang ini gindayon.
