Ginpaathag sang Commission on Elections (Comelec) nga ang election protest lamang ang paagi agud nga makahingyo sang manual recount kasunod sang resulta sang eleksyon.
Sabat ini ni Comelec spokesperson Rex Laudiangco kasunod sang panawagan ni detained senatorial candidate kag religious leader Apollo Quiboloy nga isipon liwat ang boto.
Suno kay Laudiangco nga isa man ka abogado, nagakatabo lamang ang manual recount kun una, may yara sang random manual audit (RMA) kag ikaduha, kun may na-file nga protesta sa poll body.
Nahibaluan nga naumpisahan na ang ginatumod sini nga RMA nga nakasaad gid sa layi partikular sa Republic Act 9369 ukon sa Election Automation Law.
Suno kay Laudiangco, dapat man nga maghatag ang petitioner sang basehan kun ngaa buksan liwat ang mga balota. Dapat man nga i-identify sang petitioner ang pilot precincts nga magasuporta sa iya claim nga may iregularidad sa pag-isip sang balota.
Kun mapaslawan ang petitioner nga mapamatud-an ini sa pilot precincts, mahimo ini magresulta sa pagbasura sa election protest.
Base sa abogado ni Quiboloy nga si Israelito Torreon, may mga report sang overvoting, inconsistencies sa ballot readings, kag iban pa nga electoral irregularities rason nga nagapanawagan ang pastor sang manual recount sa senatorial votes.
“With numerous reports of overvoting anomalies, inconsistencies in ballot readings, and other electoral irregularities, Pastor Quiboloy calls for a manual recount of the senatorial votes,” kabahin sang post ni Torreon. “This is not a rejection of our democratic process, but a call to strengthen it. We remain committed to seeking justice, and we will pursue all legal avenues to ensure the integrity of every vote cast.”
Sa latest partial unofficial tally sa Comelec media server, nagapang-31 si Quiboloy sa 66 senatorial candidates nga nakatipon sang 5.579 million votes.#
