Madugangan pa gid ang nagasalalampaw na nga kaso ni Bamban, Tarlac Mayor Alice Guo kun ipasaka na sang Commission on Elections (Comelec) ang election offense case batok sa iya.
Ini kasunod sang iya pagbutig kag pag-deklarar nga isa siya ka Filipino citizen sang nag-file ini sang Certificate of candidacy (COC) sang 2022 elections kag amo pa ang nagdaog sa pwesto.
Suno kay Comelec Chairman George Erwin Garcia, ang pagpakuno-kuno nga isa ka Filipino citizen ang maathag nga paglapas sa Omnibus Election Code.
Pahayag pa sini, ginahulat na lamang sang commission ang desisyon sang Office of the Solicitor General sa kaso ni Guo antes ini mag-file man sang kaso-kriminal.
Ginpasalamatan man sini ang Philippine Statistics Authority kag ang National Bureau of Investigation bangud sa ila findings kaangot sa kontrobersyal nga alcalde.
Una na nga ginpahayag sang Office of the Solicitor General (OSG) nga insigida sila nga maga-file sang quo warranto case batok kay Guo matapos ginkumpirma sang National Bureau of Investigation nga nagsanto ang iya fingerprints sa Chinese national nga si Guo Hua Ping — buot silingon, isa lang sila ka persona.
Matandaan nga sang nagligad nga semana, nagpasaka man ang PNP Criminal Investigation and Detection Group kag ang Presidential Anti-Organized Crime Commission sang nonbailable qualified human trafficking charge batok kay Mayor Guo bangud man sa illegal Pogo hub sa Bamban.
Antes ina, nag-una man ang Department of the Interior and Local Government sa pag-file sang administrative complaints batok kay Guo kag iban a nga municipal officials sa Bamban. Ang ginpasaka sa Office of the Ombudsman nga administrative complaints pending resolution ang nagalakip sang grave misconduct, serious dishonesty, gross neglect of duty kag conduct prejudicial to the best interest of the service.
